៥.១ ក្រុមបុគ្គលិកដែលមានជំនាញ និងមានការលើកទឹកចិត្តខ្ពស់ ដែលនឹងដឹកនាំ NIS ទៅអនាគត តាមរយៈ៖
– ការបង្កើត និងការប្រើប្រាស់គម្រោងគ្រប់គ្រងសមិទ្ធផល ដែលលើកទឹកចិត្ត ទទួលស្គាល់ និងផ្តល់រង្វាន់ចំពោះសមិទ្ធផល ការច្នៃប្រឌិត ភាពអាចសម្របខ្លួនបាន និងការធ្វើការជាក្រុម។
– ការបង្កើត និងការប្រើប្រាស់វិធីសាស្រ្តប្រកបដោយប្រសិទ្ធភាព ចំពោះការបណ្តុះបណ្តាល និងការអភិវឌ្ឍជំនាញ ការជ្រើសរើស និងការអនុវត្តការងារ ដែលអាចផ្តល់លទ្ធផលត្រឹមត្រូវ និងផ្តល់តម្លៃដល់ភាពចម្រុះ។
– ការកំណត់អត្តសញ្ញាណ និងការលើកកម្ពស់ការអភិវឌ្ឍអ្នកដែលនឹងផ្តល់ភាពជាអ្នកដឹកនាំនៅក្នុង NIS នៅពេលអនាគត។
៥.២ ការអភិវឌ្ឍ និងការប្រើប្រាស់លទ្ធភាពទទួលបានចំណេះដឹង និងបរិស្ថានបច្ចេកវិទ្យាទំនើបរបស់បុគ្គលិក តាមរយៈ៖
– ការកែលម្អវិធីសាស្ត្រនៃការចាប់យក ចែករំលែក រៀបចំ និងការទទួលបានចំណេះដឹង និងជំនាញ។
– ការអនុវត្ត និងការទាញយកប្រយោជន៍ពីបច្ចេកវិទ្យាកុំព្យូទ័រ អ៊ីនធឺណិត និងបច្ចេកវិទ្យាបណ្ដាញ ជាកត្តាជំរុញដល់ការច្នៃប្រឌិត ផលិតភាព និងការអនុវត្តការងារខ្ពស់។
៥.៣ ការកែលម្អ NIS និងសមិទ្ធផលបុគ្គលិក តាមរយៈ៖
– ការអភិវឌ្ឍសមត្ថភាពភាពជាអ្នកដឹកនាំ និងការគ្រប់គ្រងគម្រោងរបស់បុគ្គលិក និងការលើកកម្ពស់ការប្រើប្រាស់យ៉ាងទូលំទូលាយនូវភាពជាអ្នកដឹកនាំ និងការអនុវត្តការគ្រប់គ្រងគម្រោងល្អ។
– ការធ្វើការត្រួតពិនិត្យជាប្រចាំនូវសកម្មភាពស្ថិតិនៃ NIS និងការប្រៀបធៀបសមិទ្ធផលរបស់ NIS ធៀបទៅនឹងទីភ្នាក់ងារស្ថិតិឈានមុខគេនៅក្នុងតំបន់អាស៊ីអាគ្នេយ៍។
– ការបង្កើតសូចនាករនៃសមិទ្ធផល NIS នៅក្នុងវិស័យសំខាន់ៗ និងការត្រួតពិនិត្យលទ្ធផលជាប្រចាំ។
– ការធានាថាការកែលម្អផលិតភាពត្រូវបានចាប់យក ដើម្បីឲ្យ NIS អាចពង្រីកសេវាកម្មរបស់ខ្លួន។
៥.៤ ការធ្វើការសហការជាមួយអង្គភាពស្ថិតិរាជរដ្ឋាភិបាលផ្សេងទៀត និងទីភ្នាក់ងារ និងស្ថាប័នស្ថិតិថ្នាក់ជាតិ ជាពិសេសក្នុងការចែករំលែកការអភិវឌ្ឍប្រកបដោយការច្នៃប្រឌិត។
៥.៥ ការទទួលយកសំណូមពររបស់អ្នកប្រើប្រាស់ទិន្នន័យសំខាន់ៗ ដើម្បីជួយកំណត់អត្តសញ្ញាណ និងបង្កើតនូវការច្នៃប្រឌិតសំខាន់ៗនៅក្នុងផលិតផល និងសេវាកម្មដែល NIS ផ្តល់ជូន។